વલસાડ જિલ્લામાં ગેસની અછતનો પ્રશ્ન હવે નાનાપોંઢા તાલુકામાં પણ ગંભીર બની રહ્યો છે. ખાસ કરીને સ્થાનિક હોટલો અને ચા-નાસ્તાના સ્ટોલ પર તેની સીધી અસર જોવા મળી રહી છે. વહેલી સવારે ચા-કોફી માટે આવનારા ગ્રાહકોને યોગ્ય સેવા ન મળતાં નારાજગી વ્યક્ત કરી રહ્યા છે.
હોટલ માલિકોના જણાવ્યા અનુસાર, છેલ્લા કેટલાક દિવસોથી ગેસ સિલિન્ડરની પૂરતી સપ્લાય મળી રહી નથી, જેના કારણે તેઓ નિયમિત રીતે દુકાનો શરૂ કરી શકતા નથી. ઘણા સ્થળોએ હોટલો મોડું શરૂ થતી હોવાને કારણે રોજિંદા ગ્રાહકોને મુશ્કેલીનો સામનો કરવો પડે છે. કામ પર જવા પહેલાં ચા-નાસ્તો લેવા આવનારા લોકો માટે આ પરિસ્થિતિ ખાસ કરીને અસુવિધા જનક બની છે.
ગ્રાહકોનું કહેવું છે કે, રોજિંદા જીવનમાં આવી મૂળભૂત સેવાઓમાં વિક્ષેપ થવાથી સમય પત્રક બગડે છે. કેટલાક લોકોએ તંત્ર સામે પણ નારાજગી વ્યક્ત કરી છે અને વહેલી તકે સમસ્યાનો ઉકેલ લાવવા માંગણી કરી છે.
બીજી તરફ, હોટલ સંચાલકો તંત્રને ગેસ સપ્લાય નિયમિત કરવા માટે અપીલ કરી રહ્યા છે. તેઓનું કહેવું છે કે, જો સમયસર ગેસ ઉપલબ્ધ નહીં બને તો તેમના વ્યવસાય પર લાંબા ગાળે ગંભીર અસર પડશે.
આ પરિસ્થિતિને ધ્યાનમાં રાખીને સ્થાનિક તંત્રે તાત્કાલિક પગલાં લેવાની જરૂરિયાત ઉભી થઈ છે, જેથી સામાન્ય જનજીવન અને નાના વ્યવસાયોને રાહત મળી શકે…
